កម្មវិធីកុមាររៀនកុមារចេះ លើកកម្ពស់គុណភាពអប់រំមូលដ្ឋានសម្រាប់​កុមារនៅកម្ពុជា

ភ្នំពេញៈ ព្រឹកចន្ទនេះ ក្រសួងអប់រំ យុវជន និងកីឡា បានប្រកាសអនុវត្តកម្មវិធី «កុមាររៀនកុមារចេះ​» នៅសណ្ឋាគារហ៊ីម៉ាវ៉ារី រាជធានីភ្នំពេញ។ ការប្រកាសដាក់ឱ្យដំណើរការកម្មវិធីអប់រំសម្រាប់កុ​មា​រ​នេះ ក្នុងគោលបំណងបន្តលើកកម្ពស់គុណភាពអប់រំកុមារកម្រិតបឋមសិក្សា ដែលជាមូល​ដ្ឋា​ន​គ្រឹះមួយទ្រទ្រង់ការរៀនអក្សរនិងលេខរបស់កុមារ និងការបង្រៀននៅកម្រិតសិក្សាថ្នាក់បន្តបន្ទាប់។

កម្មវិធី «កុមាររៀនកុមារចេះ» ត្រូវបានបង្កើតឡើងតាមរយៈបទពិសោធ និងការចូលរួមរបស់អ្នកពា​ក់​ព័ន្ធផ្អែកលើភ័ស្តុតាងនៃការសិក្សាស្រាវជ្រាវនៅកម្រិតថ្នាក់ដំបូងនៃបឋមសិក្សានាពេលកន្ល​ង​មក​។​ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រ​សា​សន៍ក្នុងពិធីប្រកាសដាក់ឱ្យដំណើរការកម្មវិធីអប់រំសម្រាប់កុមារនេះថា “យើងទាំងអស់គ្នាអាចធានាបានថា នៅគ្រប់សាលារៀនក្នុងប្រទេសកម្ពុជាកុមាររៀនកុមារចេះ”។

“កុមាររៀនកុមារចេះ” បង្កើត​ដោយក្រសួងអប់រំ យុវជន និងកីឡា និង​មានការ​ចូលរួម​ពីអង្គការក្រៅរដ្ឋាភិបាលចំនួន​ ១៥ស្ថាប័ន ។ កញ្ចប់សម្ភារអំណាន និងគណិតវិទ្យាសម្រាប់កម្រិតថ្នាក់ដំបូងនៅ​ប​ឋមសិក្សានៃកម្មវិធី «កុមាររៀនកុមារចេះ» រួមមាន សៀវភៅណែនាំសម្រាប់គ្រូ និងឯកសារបង្រៀ​​ន និងរៀនសម្រាប់ប្រើប្រាស់ក្នុងមុខវិជ្ជាភាសាខ្មែរ និងគណិតវិទ្យាសម្រាប់សិស្សថ្នាក់ទី១ និងទី​២។ ឯកសារទាំងនេះ នឹងបំពេញបន្ថែមទៅលើសៀវភៅសិក្សាគោលដែលមាន​ស្រាប់​ ប្រើប្រាស់ដោយលោកគ្រូអ្នកគ្រូជាង២០០០រូប និងបានផ្តល់អត្ថប្រយោជន៍ដល់សិស្សជាង១៥ ម៉ឺននាក់។

ក្រសួងអប់រំបានឱ្យដឹងថា គ្រូបង្រៀនថ្នាក់ទី១ និងទី២ ទាំងអស់នឹងទទួលបានការបណ្ដុះបណ្ដាល និងការណែនាំអំពីវិធីសាស្ត្រថ្មីៗទាំងនេះ។ បន្ទាប់ពីបណ្តុះបណ្តាលរួចពួកគាត់នឹងទទួលបានការចុះជួយពីសំណាក់គ្រូបង្វឹក អ្នកផ្តល់ប្រឹក្សាគរុកោសល្យអំពីវិធីសាស្ត្របង្រៀនថ្មីនេះបន្ថែមទៀត។

កម្មវិធី “កុមាររៀនកុមារចេះ” តម្រូវឱ្យសិស្សថ្នាក់ទី១ រៀនបំណិនអំណា​នមូលដ្ឋាន ដូចជា ការអានអក្សរ ការផ្សំប្រកបដើម្បីអានពាក្យ អានល្បះ និងអត្ថបទងាយៗ និងការសរសេរ។ ចំពោះការរៀនគណិតវិទ្យា កុមារត្រូវរៀនលេខ រូបរាងធរណីមាត្រ និងមូលដ្ឋាននៃការគណនាជាដើម។