ប្រព័ន្ធគ្រប់គ្រងពេទ្យឌីជីថល «ពេទ្យយើង» លើកកម្ពស់បច្ចេកវិទ្យាព័ត៌មានសុខាភិបាលកម្ពុជា
ភ្នំពេញៈ "ពេទ្យយើង" ជាកម្មវិធីប្រព័ន្ធគ្រប់គ្រងមន្ទីរពេទ្យឌីជីថលថ្មីមួយ បង្កើតសម្រាប់កត់ត្រាព័ត៌មាននៅតាមមន្ទីរពេទ្យ មណ្ឌលសុខភាព មន្ទីរព្យាបាលទាំងរដ្ឋនិងឯកជន។ កម្មវិធីនេះបង្កើតឡើងដោយអ្នកស្រី ប៉ុង លីមសាន ប្រធានក្រុមហ៊ុន First Womentech Asia និងម្ចាស់ពាន់រង្វាន់សហគ្រិនស្ត្រីឆ្នើមក្នុងវិស័យបច្ចេកវិទ្យាទូរគមនាគមន៍ព័ត៌មាន (ICT) ប្រចាំឆ្នាំ២០១៩ ។
អ្នកស្រី ប៉ុង លីមសាន ស្ថាបនិកកម្មវិធីឌីជីថលសុខាភិបាលនេះ បានឱ្យដឹងថា កម្មវិធី «ពេទ្យយើង» ជាកម្មវិធីមួយងាយស្រួលក្នុងការគ្រប់ព័ត៌មានមន្ទីរពេទ្យ មានភាពច្បាស់លាស់ ពន្លឿនដំណើរការផ្សេងៗក្នុងមន្ទីរពេទ្យ ទាំងបណ្ដាគ្លីនិក និងមន្ទីរពេទ្យឯកជននានា។
អ្នកស្រី បន្ថែមថា " ខ្ញុំសង្កេតឃើញថា បណ្ដាមន្ទីរពេទ្យនិងគ្លីនិកឯកជនជាច្រើននៅកម្ពុជា នៅតែបន្តប្រើប៊ិកនិងក្រដាសកត់ត្រាព័ត៌មាន និងរបាយការណ៍សុខភាពរបស់អ្នកជំងឺ។ ខ្ញុំឃើញប្រទេសមានបច្ចេកវិទ្យាជឿនលឿនមួយចំនួនឈប់ប្រើមធ្យោបាយនេះហើយ គេប្រើបច្ចេកវិទ្យាកត់ត្រាព័ត៌មានតាមមន្ទីរពេទ្យ អ៊ីចឹងហើយ ! ខ្ញុំក៏ចាប់ផ្តើមគិតនិងបង្កើតកម្មវិធីនេះឡើង"។
ប្រព័ន្ធគ្រប់គ្រងឌីជីថល «ពេទ្យយើង» ធ្វើឱ្យមន្ទីរពេទ្យព្យាបាលអ្នកជំងឺកាន់តែមានប្រសិទ្ធភាព និងអាចសន្សំពេលវេលា។ កម្មវិធីគ្រប់គ្រងមន្ទីរពេទ្យគ្រប់កម្រិត ទាំងមន្ទីរពេទ្យឯកជននិងរដ្ឋនេះ គឺគ្រប់គ្រងទិន្នន័យតាម Online និង Offline។
ទន្ទឹមគ្នានេះ កម្មវិធីថ្មីសម្រាប់វិស័យសុខាភិបាល ក៏មានមុខងារគ្រប់គ្រងកន្លែងស្ដុកឱសថ កាលបរិច្ឆេទប្រើប្រាស់ថ្នាំ កាលបរិច្ឆេទជួបពេទ្យ កញ្ចប់សេវាព្យាបាល ធានារ៉ាប់រង របាយការណ៍ពិនិត្យសុខភាព លំហូរសាច់ប្រាក់ និងធនធានមនុស្សនៅក្នុងស្ថាប័ន។
សូមជម្រាបថា “ពេទ្យយើង” ជាកម្មវិធីទីមួយនៅកម្ពុជា ដែលលើកកម្ពស់វិស័យសុខាភិបាលបង្កើតឡើងស្ត្រី ហើយអ្នកស្រី ប៉ុង លីមសាន ស្ថាបនិកកម្មវិធីនេះ បានជាប់ពាន់រង្វាន់ជាស្ត្រីឆ្នើមក្នុងវិស័យបច្ចេកវិទ្យាទូរគមនាគមន៍ព័ត៌មាន (ICT) ប្រចាំឆ្នាំ២០១៩ នេះ រៀបចំដោយក្រសួងប្រៃសណីយ៍ និងទូរគមនាគមន៍។
អត្ថបទម៉ៅ សំណាង លម្អិតព័ត៌មានវីដេអូសូមចូលទៅកាន់កម្មវិធីបេសកកម្មប្រចាំសប្តាហ៍ !
Comments
Post a Comment