ឯកអគ្គរដ្ឋទូតអូស្ត្រាលីប្រចាំកម្ពុជា ជួបរដ្ឋមន្ត្រីក្រសួងឧស្សាហកម្មពិភាក្សាការងារអភិវឌ្ឍន៍ទឹកស្អាត

ឯកឧត្តម Pablo Kang ឯកអគ្គរដ្ឋទូតអូស្ត្រាលីប្រចាំកម្ពុជា ជួបឯកឧត្តមរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅរសៀលថ្ងៃទី២៨ ខែកក្កដា ឆ្នាំ២០២០ នៅទីស្តីការក្រសួង។ 

ឯកឧត្តមរដ្ឋមន្ត្រីក្រសួងឧស្សាហកម្ម បានកោតសរសើរចំពោះលទ្ធផលបំពេញបេសកកម្មការទូតរបស់ ឯកឧត្តម Pablo Kang ឯកអគ្គរដ្ឋទូតអូស្ត្រាលីប្រចាំកម្ពុជា ព្រមទាំងបានជម្រុញការងារគម្រោងអភិវឌ្ឍន៍ក្នុងវិស័យហេដ្ឋារចនាសម្ព័ន្ធ និងអភិវឌ្ឍន៍លើវិស័យទឹកស្អាតនៅកម្ពុជាផលដែរ។

ជំនួបនេះ ធ្វើឡើងនៅរសៀលថ្ងៃទី២៨ ខែកក្កដា ឆ្នាំ២០២០ នៅទីស្តីការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងបំណងសម្តែងការគួរសម និងពិភាក្សាការងារ។

ទាក់ទងនឹងគម្រោងទឹកស្អាតនេះ ឯកឧត្តមរដ្ឋមន្ត្រីក្រសួងឧស្សាហកម្ម មានប្រសាសន៍ថា តាមរយៈគម្រោង3i (Investing in Infrastructure) ក្រសួងឧស្សាហកម្ម​កំពុងបន្តអនុវត្តការបណ្តាញទឹកស្អាតជូនដល់ប្រជាពលរដ្ឋដោយឥតគិតថ្លៃក្នុងតំបន់មួយចំនួន គឺជាសមិទ្ធផលគួរសាទរ។

ទន្ទឹមគ្នានេះ ឯកឧត្តមរដ្ឋមន្ត្រីក្រសួងឧស្សាហកម្ម បានបន្ថែមថា ការអនុវត្តន៍វិធីសាស្ត្រមិនយកថ្លៃប្រើប្រាស់ទឹកក្នុងតំបន់ណាមួយ មិនអាចធានានិរន្តរភាពយូរអង្វែងបានឡើយ ដោយសារភាពកំសោយផ្នែកគ្រប់គ្រង និងថែរក្សា ហើយឈានទៅជួបបញ្ហាទៅថ្ងៃក្រោយ។

ជាដំណោះស្រាយឯកឧត្តមរដ្ឋមន្ត្រីបានលើកឡើងថា ដើម្បីធានានិរន្តរភាពយូរអង្វែងក្នុងការគ្រប់គ្រងបណ្តាញទឹកស្អាត ក្រសួង ក៏ដូចជារាជរដ្ឋាភិបាល បានដាក់ចេញគោលនយោបាយរួចជាស្រេចក្នុងការអនុគ្រោះថ្លៃប្រើប្រាស់ទឹកចំពោះប្រជាពលរដ្ឋដែលមានជីវភាពក្រីក្រ និងប្រជាពលរដ្ឋក្នុងកំរិតជីវភាពមធ្យមជាដើម។

ចំណែក ឯកឧត្តម Pablo Kang ឯកអគ្គរដ្ឋទូតអូស្ត្រាលីប្រចាំកម្ពុជា បានបង្ហាញការគាំទ្រ និងស្វែងយល់ពីដំណើរការផ្គត់ផ្គង់ទឹកស្អាតនៅកម្ពុជា។ ឯកឧត្តម ឯកអគ្គរដ្ឋទូត បានបន្ថែមថា នៅពេលខាងមុខ ភាគីទាំងពីរនឹងពង្រឹងទំនាក់ទំនងក្នុងភាពវិជ្ជមានបន្ថែមទៀត ទាំងលើការអភិវឌ្ឍន៌វិស័យទឹកស្អាតទាំងការវិនិយោគ និងជំរុញវិស័យឯកជនផងដែរ។

*ខ្លឹមសារដកស្រង់ពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍