 |
| រូបតំណាងដកស្រង់ពីទំព័រហ្វេសប៊ុកអង្គការភ្លែនអន្តរជាតិកម្ពុជា |
ស្ទឹងត្រែង៖ កង្វះអាហារូបត្ថម្ភក្នុងចំណោមកុមារអាយុក្រោមប្រាំឆ្នាំ និងស្ត្រីក្នុងវ័យបន្តពូជនៅតែជាបញ្ហាចំបងមួយនៅកម្ពុជា ជាពិសេសតំបន់ដាច់ស្រយាលនៃខេត្តស្ទឹងត្រែង។ កង្វះអាហារូបត្ថម្ភទាំងនេះ រួមមាន កង្វះអាហារដែលមានជីវជាតិចិញ្ចឹមគ្រប់គ្រាន់ ចំណេះដឹងតិចតួចអំពីសុខភាពមាតានិងទារក ការថែទាំកុមារក្នុងដំណាក់កាល១០០០ថ្ងៃដំបូង ព្រមទាំងកង្វះលទ្ធភាពទទួលបានទឹកស្អាតនិងអនាម័យក្នុងការផ្តល់អាហារ។
យោងតាមរបាយការណ៍អង្កេតប្រជាសាស្ត្រនិងសុខភាពកម្ពុជាឆ្នាំ២០១៤ បានឱ្យដឹងថា កង្វះអាហារូបត្ថម្ភក្នុងចំណោមកុមារក្រោមប្រាំឆ្នាំក្នុងខេត្តស្ទឹងត្រែងច្រើនជាងមធ្យមភាគថ្នាក់ជាតិ។ ខេត្តនេះមានកុមារក្រិសក្រិន៤៤ភាគរយ ខណៈមធ្យមភាគថ្នាក់ជាតិ៣២ភាគរយ កុមារស្គមស្គាំង ១៣.៨ភាគរយ ខណៈ មធ្យមភាគថ្នាក់ជាតិ៩.៦ភាគរយ និងកុមារមានទម្ងន់ស្រាល៣០.៧ភាគរយ ខណៈមធ្យមភាគថ្នាក់ជាតិមាន ២៥ភាគរយ។
ដើម្បីដោះស្រាយបញ្ហាកង្វះអាហារូបត្ថម្ភនេះ អង្គការភ្លែនអន្តរជាតិសហការជាមួយអង្គការវឌ្ឍនភាព អនុវត្តគម្រោង ‘១០០០ថ្ងៃដំបូង ស្តីពីសន្តិសុខស្បៀងនិងបង្កើនភាពបន្សុាំដើម្បីលើកកម្ពស់សុខភាពមាតានិងកុមារ ក្នុងខេត្តស្ទឹងត្រែង ដែលបានសម្ពោធនៅថ្ងៃទី២៨ ខែមករា ឆ្នាំ២០១៩ នៅសាលាខេត្តស្ទឹងត្រែង។
គម្រោងកំពុងចាប់ផ្តើមមានរយៈពេលប្រាំឆ្នាំក្នុងទំហំទឹកប្រាក់ប្រមាណ១,៥លានដុល្លារសហរដ្ឋអាមេរិកនេះ នឹងជួយកាត់បន្ថយអត្រាកង្វះអាហារូបត្ថម្ភកុមារ និងស្រ្តីក្នុងវ័យបន្តពូជតាមរយៈការធានាឲ្យមានសន្តិសុខស្បៀងសមស្របនៅក្នុងគ្រួសារ។
 |
| លោក យី គីមថាន នាយករងប្រចាំប្រទេសផ្នែកកម្មវិធីនៃអង្គការភ្លែនអន្តរជាតិកម្ពុជា |
លោក យី គីមថាន នាយករងប្រចាំប្រទេសផ្នែកកម្មវិធីនៃអង្គការភ្លែនអន្តរជាតិកម្ពុជា មានប្រសាសន៍ថា៖ «ការវិនិយោគលើអាហារូបត្ថម្ភ គឺជាគាំទ្រកុមារឲ្យទទួលបានការអភិវឌ្ឍប្រកបដោយសុវត្ថិភាព និងជោគជ័យចាប់ពីពេលចាប់កំណើតរហូតដល់ពេញវ័យ»។
លោកបានបន្តថា៖ «ការផ្តល់អាហារូបត្ថម្ភគ្រប់គ្រាន់ និងអនុវត្តអនាម័យសមស្របដល់កុមារក្នុងរយៈពេល ១០០០ថ្ងៃដំបូងចាប់តាំងពីចាប់កំណើតក្នុងផ្ទៃម្តាយ រហូតដល់អាយុពីរឆ្នាំ សំខាន់ណាស់ដើម្បីការពារពួកគេពីកង្វះអាហារូបត្ថម្ភ និងបញ្ហាក្រិសក្រិន។ នេះជាមូលហេតុដែលគម្រោងធ្វើការផ្តោតសំខាន់លើក្រុមស្ត្រីក្នុងវ័យបន្តពូជ ស្ត្រីមានផ្ទៃពោះ ស្ត្រីបំបៅដោះកូនដោយទឹកដោះ និងកុមារក្រោមប្រាំឆ្នាំ»។
គម្រោងនេះនឹងផ្តល់អត្ថប្រយោជន៍ដល់កុមារអាយុក្រោមប្រាំឆ្នាំក្នុងខេត្តស្ទឹងត្រែង ជិត៩០០០នាក់ តាមរយៈរូបភាពទីមួយ ជំរុញឱ្យទទួលបានសេវាសុខភាពទារក និងកុមារអាយុក្រោមប្រាំឆ្នាំនិងស្រ្តីក្នុងវ័យក្មេង វ័យបន្តពូជ, ទីពីរបង្កើនការអនុវត្តអាហារូបត្ថម្ភសមស្រមតាមគ្រួសារ, ទីបី លើកកម្ពស់ការប្រើប្រាស់ទឹកស្អាតនិងអនាម័យ និងទីបួនបង្កើនការផលិតអាហារប្រកបដោយជីវជាតិនៅតាមផ្ទះស្រមតាមវិធីសាស្រ្តកសិកម្ម។
សូមជម្រាបថា គម្រោងលើកកម្ពស់អាហារូបត្ថម្ភកុមារ ១០០០ថ្ងៃដំបូង ខេត្តស្ទឹងត្រែងខាងលើនេះអនុវត្តក្នុងស្រុកចំនួនបី រួមមាន ស្រុកសៀមបូក ស្រុកថាឡាបរិវាត់ និងស្រុកសេសាន ចាប់ផ្តើមពីចុងឆ្នាំ ២០១៨ រហូតដល់ខែវិច្ឆិកា ២០២៣ ក្រោមជំនួយឧបត្ថម្ភពីក្រសួងសហព័ន្ធអាល្លឺម៉ង់សម្រាប់កិច្ចសហប្រតិបត្តិការសេដ្ឋកិច្ចនិងអភិវឌ្ឍន៍ (BMZ) និងអង្គការភ្លែនអន្តរជាតិអាល្លឺម៉ង់។
អត្ថបទ ម៉ៅ សំណាង
Comments
Post a Comment