ទិវាជាតិអំណានឆ្នាំ​២០២០​ មានសកម្មភាពច្រើនជាងឆ្នាំមុនៗ

ភ្នំពេញ : ទិវាជាតិអំណាន១១មីនា លើកទី៥ ឆ្នាំ២០២០ ធ្វើឡើង​ក្រោមប្រធានបទ "ការអានបណ្តុះបញ្ញា ការស្រា​វ​ជ្រាវ និងនវានុវត្តន៍"។ ទិវាជាតិអំណានឆ្នាំនេះ នឹង​មានសកម្មភាពលើកកម្ពស់ការអានជាច្រើនក្នុងន័យជម្រុញឱ្យវិស័យអំ​ណា​នកាន់ទូលំទូលាយនៅកម្ពុជា។ ទីតាំងប្រារព្ធទិវាជាតិអំណាន នៅវិទ្យាស្ថានបច្ចេកវិទ្យាកម្ពុជា។ ​នេះជាការលើកឡើង​​របស់ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នៅក្នុងសន្និសីទសារព័ត៌​មា​ន​ស្ដីពីការរៀបចំទិវាជាតិអំណានលើកទី៥ នៅទីស្ដីការក្រសួងអប់រំ នាព្រឹកថ្ងៃចន្ទនេះ។

រដ្ឋមន្ត្រីក្រសួងអប់រំ មានប្រសាសន៍បញ្ជាក់ថា ការប្រារព្ធទិវាជាតិ​អំណានឆ្នាំនេះ មាន​លក្ខណៈ​ទូលំទូលាយជាងទិវាជាតិអំណានឆ្នាំ​២០​១៩​ កន្លង​ទៅ។ ទិវាជាតិអំណានចាប់ផ្តើមពីថ្ងៃទី០៦ ខែមីនា មានការតាំង​​ពិព័រណ៍សៀវភៅសម្បូរបែបរហូតដល់ ១០៤បញ្ជរ (ស្តង់) និង​​លក់បញ្ចុះតម្លៃ, មាន​​​សិក្ខាសាលាស្តីពីអំណានដំបូង, កម្មវិធីសួនអំណានសម្រា​ប់​កុមារ, ការប្រគុំតន្ត្រី, កម្មវិធីដោះដូរសៀវភៅអាន, និងការលេងល្បែងកំសាន្តល្បងប្រាជ្ញាសប្បាយៗ។

ទន្ទឹមគ្នានេះ ទិវាជាតិអំណានឆ្នាំ២០២០​ ក្រសួងអប់រំ​នឹង​​រៀបចំយុទ្ធនាការ "តោះអានរាល់ថ្ងៃ" ដើម្បីបណ្តុះទម្លាប់អាន ជំរុញវប្បធម៌អាន លើកកម្ពស់ការអាន និងតែងនិពន្ធ ពីថ្ងៃទី០៦ ដល់ថ្ងៃទី១៥ នៅតាមបណ្តាខេត្តផងដែរ។

ចាប់​ពីថ្ងៃទី០៨ ដល់ថ្ងៃទី១១ មីនា ទិវាជាតិអំណាន​មានប្រកួតប្រជែង និងប្រកាសលទ្ធផលជ័យលាភីវិញ្ញាសារ​អានអត្ថបទ ស្មូតកំណាព្យ និងតែងនិពន្ធ។ ក្នុងនោះដែរ មានបាឋកថាស្តីពីអក្សរសិល្ប៍ និងភាសាខ្មែរសម័យមុនអង្គរនិងសម័យអង្គរតាមរយៈសិលាចារឹក, ការបង្ហាញពីតួនាទីទស្សនាវដ្តីកម្ពុជសុរិយា, ការបង្ហាញអត្ថបទសិក្សាកថាស្ដីអំពីតួនាទីអក្សរសិល្ប៍ក្នុងសង្គម និងការតែងនិពន្ធក្នុងសម័យទំនើប(ឌីជីថល), វិធីគ្រប់គ្រងបណ្ណាល័យ និងផ្សព្វផ្សាយស្តង់ដារបណ្ណាល័យជាដើម។

ក្នុងសន្និសីទសារព័ត៌មាន ក្រសួងអប់រំ បានឱ្យដឹងថា ទិវាអំណានជាតិ ២០២១ និងបណ្តាឆ្នាំខាងមុខៗទៀត ក្រសួងអប់រំគ្រោងរៀបចំឱ្យទូលំទូលាយនៅគ្រប់ ២៥ រាជធានី-ខេត្ត។ កន្លងទៅក្រសួងអប់រំ យុវជន​ និង​កីឡា បាន​រៀបចំ​ទិវាជាតិ​អំណាន ​១១មីនា​ ជារៀងរាល់ឆ្នាំ​ ចាប់​តាំងពី​ឆ្នាំ២០១៦។

កន្លងទៅ ទិវាជាតិ​អំណាន​​បាន​រៀបចំ​តាំងពី​ថ្នាក់​ក្រោម​ជាតិ​រហូត​ដល់​ថ្នាក់​ជាតិ ​ដោយ​សហការ​ជាមួយ​ក្រសួង​ស្ថាប័ន​ពាក់ព័ន្ធ​ រដ្ឋអំណាច​ អាជ្ញាធរគ្រប់​លំដាប់​ថ្នាក់​ ដៃ​គូ​អភិវឌ្ឍ​និង​អ្នក​ពាក់ព័ន្ធ​ដទៃ​ទៀត។​ ជាការកត់សម្គាល់ពី​មួយ​ឆ្នាំ​ទៅ​មួយ​ឆ្នាំ​ ការ​ប្រារព្ធ​ទិវា​ជាតិអំណានកាន់តែទូលំទូលាយនិងផុលផុសចាប់អារម្មណ៍ពីគ្រប់មជ្ឈដ្ឋាន ដោយមានកម្មវិធីសំខាន់ៗជាច្រើន ជម្រុញ​និងលើកកម្ពស់អំណាននៅកម្ពុជា៕