 |
| វ៉ាត មុំ រៀបរាប់ពីការប្រើប្រាស់ទឹកប្រចាំថ្ងៃនៅក្នុងគ្រួសារ ខណៈប្រជាពលរដ្ឋទូទាំងភូមិកង្កែបទាំងមូលកំពុងខ្វះខាតទឹកស្អាតប្រើប្រាស់នៅរដូវប្រាំងនេះ - រូបភាពក្រុមការងារ PNN |
កំពង់ឆ្នាំង៖ "ខែប្រាំងយើងទិញទឹកដាក់ពាង ខែវស្សាអាចត្រងទឹកភ្លៀងអីប្រើបានខ្លះ! សម្រាប់ខែប្រាំងរយៈពេលមួយអាទិត្យ ជាទូទៅគ្រួសារខ្ញុំប្រើអស់បីធុង (បីធុងសាំង) ហើយទឹកមួយធុង បើទឹកថ្លាល្អគេលក់ឱ្យបីពាន់រៀល បើទឹកមិនសូវល្អ ទឹកមានពណ៌ក្រហមអី គេលក់ពីរពាន់ប្រាំរយរៀល យើងទិញមកដាក់ពាងផ្សេងគ្នា មួយសម្រាប់ហូបចុក មួយសម្រាប់ប្រើប្រាស់ផ្សេងៗ"។ នេះជាការរៀបរាប់ពីប្រភពទឹករបស់យុវតី វ៉ាត មុំ អាយុ ២៧ឆ្នាំ ជាប្រជាពលរដ្ឋម្នាក់រស់នៅភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង។ គ្រួសារមុំ កំពុងខ្វះខាតទឹកស្អាតប្រើប្រាស់នៅរៀងរាល់រដូវប្រាំងជាច្រើនឆ្នាំមកហើយ។
ភូមិកង្កែប មានភូមិសាស្រ្តស្ថិតនៅភាគខាងជើង និងមានចម្ងាយប្រមាណជាង ២៨ គីឡូម៉ែត្រពីទីរួមខេត្តកំពង់ឆ្នាំង។ នៅក្នុងភូមិកង្កែប គ្រួសារមុំមិនខុសពីប្រជាពលរដ្ឋសរុប ៤២៩ គ្រួសារផ្សេងទៀតក៏កំពុងជួបការលំបាកខ្វះខាតទឹកស្អាតប្រើប្រាស់នៅក្នុងរដូវប្រាំងនេះដែរ។ ដោយសារទីនេះជាតំបន់ខ្សត់ទឹក មានចម្ងាយឆ្ងាយពីទីប្រជុំជនស្រុក ជាទីតាំងពិបាកខួង ឬជីកអណ្ដូងទឹក។
រដូវប្រាំងអ្នកភូមិអត់ទឹកប្រើប្រាស់ប្រចាំថ្ងៃជារឿងលំបាកមួយទៅហើយ វារឹតតែលំបាកមួយកម្រិតទៀតនៅពេលដែលជំងឺផ្លូវដង្ហើមកូវីដ១៩ ថ្មីសន្លាង កំពុងធ្វើឲ្យប្រជាពលរដ្ឋទូទាំងឃុំច្រណូកទាំងមូលព្រួយបារម្ភពីការឆ្លងរីករាលដាលដល់អ្នកភូមិ។ ព្រួយបារម្ភដោយសារទីនេះ គ្មានទឹកស្អាតគ្រប់គ្រាន់ដើម្បីលាងសម្អាតដៃនឹងសាប៊ូ កំពុងខ្សត់ខ្សោយទឹកផឹក និងខ្វះទាំងទឹកងូតសម្អាតខ្លួនប្រាណ។
វ៉ាត មុំ បានបញ្ជាក់បន្ថែមថា៖ "បើបុកអណ្តូងទីនេះក៏បុកអត់ចេញដែរ ដោយសារតែតំបន់នេះជាតំបន់ភ្នំដីជម្រាល បុកជម្រៅបានពីរឬបីម៉ែត្រដល់ថ្មចេញមកតែគ្រួសទេ អីចឹងយើងអត់មានទឹកប្រើប្រាស់ទេ ចាប់តាំងពីខែ១២ រហូតដល់ខែ៦ ! គិតជាមធ្យមគ្រួសារខ្ញុំប្រើទឹកអស់មួយខែពី ៤ម៉ឺនទៅ ៥ម៉ឺនរៀល ហ្នឹងគឺប្រើសន្សំសំចៃបំផុតហើយ ! ងូតទឹក ខ្ញុំងូតបានតែម្តងទេនៅពេលល្ងាច ពេវលព្រឹកអត់សូវបានងូតប៉ុន្មានទេ បានតែចាក់លាងដៃលាងជើងតិចតួចទេ"។
គ្រួសារមុំ មានបង្គន់អនាម័យប្រើប្រាស់មួយសមរម្យនឹងគេដែរ ប៉ុន្តែចៃដន្យអីរដូវប្រាំងនេះខ្សត់ទឹក បង្គន់អនាម័យមានទឹកមានត្រឹមតែពីរទៅបីផ្តិលប៉ុណ្ណោះ។ មុំបានឱ្យដឹងទៀតថា អត់ទឹកវាពិតជាលំបាកសម្រាប់ស្ត្រី ដោយសារទឹកត្រូវប្រើប្រាស់ត្បិតត្បៀតបំផុតតាមតែអាចធ្វើទៅបាន ពុំនោះទេគ្មានប្រាក់សម្រាប់ទិញទឹកឡើយ។
ជិះម៉ូតូហុងដាឌ្រីម ពណ៌ខ្មៅប្រឡាក់ដីសក្រហមតិចៗមើលស្ទើរមិនស្គាល់ម៉ាកម៉ូតូ មានកាតាបយូរដៃមួយដាក់តាមជាប់ខ្លួន ពាក់ម៉ាស់ផងនោះ គឺលោកមេឃុំច្រណូក ទើបតែមកពីផ្សព្វផ្សាយសារអប់រំសុខភាពពីជំងឺកូវីដ១៩តាមភូមិ។ ដើម្បីឱ្យដឹងស៊ីជម្រៅពីរឿងរ៉ាវប្រើប្រាស់ទឹកនៅភូមិកង្កែបនេះ លោក ឈុំ ឈាង មេឃុំច្រណូក ស្រុកកំពង់លែង បានឱ្យដឹងថា ប្រជាជនក្នុងភូមិកង្កែបទាំងមូលខ្វះខាតទឹកប្រើប្រាស់នៅរដូវប្រាំង ហើយមានមធ្យោបាយដោះស្រាយតែមួយគត់ជាលក្ខណៈគ្រួសារ គឺទិញទឹកដឹកមកពីទីឆ្ងាយៗតាមរ៉ឺម៉កគោយន្តជាជម្រើសល្អបំផុត។
លោក ឈុំ ឈាង មេឃុំច្រណូក ៖ "ពាក់ព័ន្ធអារឿងទឹកហ្នឹង ឃើញថាខែនេះក្តៅមែន តែយើងអាចទិញដូរទឹកគេយកមកប្រើប្រាស់បានតាមតម្រូវការដូចរៀងរាល់ឆ្នាំ ព្រោះកន្លែងនេះវាអត់ទឹកតាំងពីដើមម្ល៉េះ។ មិនមែនថា មិនមានអណ្តូងទេ គឺមាន ប៉ុន្តែជីកវាមិនចេញ ជីកមិនទៅមុខវាមិនរួច វាក្តាំងថ្មបាតក្រោមវាពិបាក"។
មិនខុសពីលោកមេឃុំច្រណូកខាងលើនេះ លោក ឆែម ពៅ អាយុ៧០ឆ្នាំ អាចារ្យវត្តថ្មកង្កែប ជាចាស់ទុំក្នុងភូមិក៏បានរៀបរាប់ពីការលំបាកខ្លះៗរបស់អ្នកភូមិដែរថា ៖ "តំបន់មានភ្នំ យើងជីកអណ្តូងដូចជិតៗទីនេះអត់ចេញតែម្តង ហើយនៅជាយភូមិនេះជីកអណ្តូងអត់ចេញទឹកទេ ចង់បានទឹកប្រើត្រូវទៅដឹកទឹកមកពីឆ្ងាយៗ យកទឹកអណ្តូងគេបុកខាងក្រោមៗ យកមកលក់ចែកប្រជាជនទទួលទាន"។
ងាយទៅនិយាយពីអ្នកដឹកទឹកលក់វិញម្តង។ ម៉ោង៤ល្ងាចទៅហើយ គោយន្តដឹកទឹករបស់លោក ហ៊ឹត វុទ្ធី ជាអ្នកដឹកទឹកលក់ក្នុងភូមិកង្កែបម្នាក់ក្នុងចំណោមអ្នកដឹកទឹកប្រាំគោយន្តផ្សេងទៀត ត្រៀមបរចេញពីភូមិមុនថ្ងៃលិច បន្ទាប់ពីដាក់ទឹកឱ្យអតិថិជនរួច។ មុននឹងចាកចេញលោកបាននិយាយមូលហេតុមួយចំនួនជំរុញឱ្យលោកចាប់របរជាអ្នកដឹកទឹកលក់ក្នុងភូមិថា "ភូមិឃុំយើងខ្វះទឹក ប្រជាពលរដ្ឋខ្វះទឹក ផុតពីការងារធ្វើស្រែមក ខ្ញុំតែងតែចាប់អាជីពដឹកទឹកលក់ក្នុងភូមិ ! ខ្ញុំដឹកទឹកមួយជើងចំណេញបានតិចតួចណាស់ កាត់ប្រេងអស់ទៅបាន ១ម៉ឺនរៀល ជួនកាលបាន១ម៉ឺនជាងចឹងទៅ ប្រជាពលរដ្ឋខ្លះគ្នាអ្នកខ្វះខាតក៏ឱ្យជំពាក់សិនទៅ បើអ្នកមានលុយក៏ឱ្យអស់តាមហ្នឹងដែរទៅ"។
សំណួរថា ហេតុអ្វីអ្នកភូមិកង្កែប និងអ្នកភូមិទូទាំងឃុំច្រណូកទាំងមូល នៅតែជួបការលំបាកដោយសារកង្វះទឹកស្អាតប្រើប្រាស់? ពិសេសតម្រូវការទឹកស្អាតប្រើប្រាស់ក្នុងដំណាក់កាលជំងឺផ្លូវដង្ហើម COVID-19? លោក ហ៊ូ ប៊ុនថន អភិបាលរងនៃគណៈអភិបាលស្រុកកំពង់លែង មានប្រសាសន៍ថា៖ "យើងទទួលស្គាល់ចំពោះបញ្ហានៃការប្រើប្រាស់ទឹកបច្ចុប្បន្នសម្រាប់នៅមូលដ្ឋានផ្ទាល់ ប៉ុន្តែអ្វីដែលជាសារសំខាន់របស់អាជ្ញាធរ ក៏ដូចជាថ្នាក់ដឹកនាំទៅកាន់បងប្អូនប្រជាពលរដ្ឋនោះ ទី១ គឺការប្រើប្រាស់ទឹកនៅក្នុងគោលការសន្សំសំចៃ ក្នុងដំណាក់កាលខ្វះខាតទឹកនេះ គាត់អាចរៀបចំធុងបង្ហូរទឹកចេញតិចៗ ដើម្បីលាងសម្អាតដៃ ព្រោះយើងអត់ទាន់មានប្រព័ន្ធទឹកស្អាតតចូល។ ទន្ទឹមគ្នានេះផងដែរ គឺអាជ្ញាធរខិតខំដោះស្រាយជូនតាមកម្រិតលទ្ធភាព"។
ទោះយ៉ាងណាក៏ដោយ ក្នុងដំណាក់កាលនិយាយពីការអប់រំសុខភាពបញ្ឈៀសការឆ្លងរីករាលដាលជំងឺកូវីឌ១៩ នៅពេលនេះ យុវតី វ៉ាត មុំ នៅតែបន្តនិយាយទាំងស្នាមញញឹមស្ងួតថា "សារអប់រំសុខភាពឱ្យលាងដៃហ្នឹង លាងសម្អាតដៃឱ្យស្អាតត្រូវតែប្រើទឹកច្រើន ប្រើសាប៊ូ អីចឹងត្រូវលាងដៃពីរដង ត្រូវចាក់ទឹកមុនលាងសាប៊ូហ្នឹងម្តង លាងសាប៊ូម្តងទៀត ចុះបើយើងខ្សត់ទឹកអីចឹងបានអី?" ។
សូមបញ្ជាក់ថា ឃុំច្រណូក ស្រុកកំពង់លែងនេះ មានបួនភូមិ មានប្រជាជនសរុបទាំងអស់ ១៨៨៤គ្រួសារ។ ប្រជាជនទាំងបួនភូមិ មិនទាន់មានទឹកស្អាតប្រើប្រាស់គ្រប់គ្រាន់នៅឡើយទេរហូតមកដល់ឆ្នាំ ២០២០នេះ។ រដូវវស្សាប្រជាជនត្រូវពឹងលើទឹកភ្លៀង ចំណែករដូវប្រាំងត្រូវទិញទឹកទាំងស្រុងដែលដឹកលក់នៅតាមភូមិ។
តាមការបញ្ជាក់របស់ថ្នាក់ដឹកនាំស្រុកកំពង់លែង និងរដ្ឋបាលខេត្តកំពង់ឆ្នាំង បានឱ្យដឹងថា អាជ្ញាធរខេត្តកំពុងគិតគួរដោះស្រាយបញ្ហាកង្វះទឹកជូនប្រជាពលរដ្ឋឃុំច្រណូកនេះឱ្យបានប្រើប្រាស់ក្នុងពេលឆាប់ៗខាងមុខ។ ទន្ទឹមគ្នានេះ ខេត្តបានត្រៀមដឹកទឹកជូនប្រជាពលរដ្ឋក្នុងករណីខ្វះខាតទឹកប្រើប្រាស់ខ្លាំង៕
អត្ថបទ ម៉ៅ សំណាង ចុចទីនេះលម្អិតព័ត៌មានបន្ថែម(វីដេអូ) កម្មវិធីបេសកកម្មប្រចាំសប្តាហ៍នៃទូរទស្សន៍ភី.អិន.អិន !
Comments
Post a Comment