ធនាគារអភិវឌ្ឍន៍ជនបទ ទំលាក់ប្រាក់ ៥០លានដុល្លារឲ្យកសិករចិញ្ចឹមត្រី ចិញ្ចឹមសត្វ និងដាំដុះបន្លែ

ឯកឧត្តម កៅ ថាច ធនាគារអភិវឌ្ឍន៍ជនបទនិងកសិកម្ម នាឱកាសចុះផ្សព្វផ្សាយគោលការណ៍ឥណទាន និងលក្ខខណ្ឌទទួលបានឥណទានពិសេសរបស់រាជរដ្ឋាភិបាល មានប្រសាសន៍នៅរសៀលថ្ងៃព្រហស្បតិ៍ ទី២៨ ខែឧសភានេះ នៅនៅសាលាខេត្តកំពង់ចាម។ ប្រភពរូបភាពដើមអម្ពិល

កំពង់ចាម៖ ធនាគារអភិវឌ្ឍន៍ជនបទនិងកសិកម្ម ទំលាក់ថវិកាឥណទានពិសេស ៥០លានដុល្លារអាមេរិក ឱ្យប្រជាកសិករចិញ្ចឹមត្រី ចិញ្ចឹមសត្វ ដាំដុះបន្លែ រៀបចំផែនការកសិកម្មនិងចិញ្ចឹមឱ្យច្បាស់លាស់ ដើម្បីធ្វើការផ្គត់ផ្គង់តម្រូវទីផ្សារស្បៀងអាហារក្នុងស្រុកប្រកបដោយនិរន្តរភាព។ ក្នុងន័យនេះ សម្តៅចូលរួមកាត់បន្ថយការនាំចូលពីប្រទេសជិតខាង បង្កើតឱកាសការងារ និងលើកកម្ពស់វិស័យកសិកម្មឱ្យកាន់តែប្រសើរឡើង។ នេះបើតាមឯកឧត្តម កៅ ថាច ធនាគារអភិវឌ្ឍន៍ជនបទនិងកសិកម្ម ក្នុងឱកាសចុះផ្សព្វផ្សាយគោលការណ៍ឥណទាន និងលក្ខខណ្ឌទទួលបានឥណទានពិសេសរបស់រាជរដ្ឋាភិបាល នៅរសៀលថ្ងៃព្រហស្បតិ៍ ទី២៨ ខែឧសភានេះ នៅសាលាខេត្តកំពង់ចាម ។

គោលការណ៍ឥណទាន និងលក្ខខណ្ឌទទួលបានឥណទានក្រោមកម្មវិធីហិរញ្ញប្បទានពិសេសរបស់រាជរដ្ឋាភិបាល មានទឹកប្រាក់ចំនួន ៥០លានដុល្លារអាម៉េរិកនេះ នឹងជូនដល់ប្រជាសហគមន៍ចិញ្ចឹមសត្វ ចិញ្ចឹមត្រី ដាំដុះបន្លែ និងផ្លែឈើ និងក្រុមសិប្បកម្ម សហគ្រាសធុនតូច និងមធ្យម ក្នុងវិស័យផលិតផលកសិកម្ម វិស័យកសិ-ឧស្សាហកម្ម និងវិស័យកសិកម្ម ក្នុងខេត្តកំពង់ចាម សរុបចំនួនប្រមាណជាង២០០នាក់។

ឯកឧត្ត កៅ ថាច បានបន្តថា ឥណទានក្រោមកម្មវិធីហិរញ្ញប្បទានពិសេសរបស់រាជរដ្ឋាភិបាល ចំនួន ៥០លានដុល្លារអាមេរិកនេះ បង្កើតឡើងដើម្បីឱ្យមានលទ្ធភាពពង្រីកអាជីវកម្ម និងធ្វើឱ្យប្រសើរឡើងនូវខ្សែសង្វាក់ផលិតកម្មក្នុងគោលដៅបង្កើតការងារបន្ថែម ពង្រឹងភាពប្រកួតប្រជែង និងពង្រីកមូលដ្ឋានផលិតក្នុងស្រុក សម្រាប់ជំរុញការនាំចេញ និងកាត់បន្ថយការនាំចូលនៅក្នុងដំណាក់កាលដែលសេដ្ឋកិច្ចកម្ពុជាជួបប្រទះបញ្ហាប្រឈមមួយចំនួនកើតចេញពីជំងឺឆ្លង COVID-19 និងបញ្ហា EBA។

កម្មវិធីហិរញ្ញប្បទានពិសេស ទឹកប្រាក់ចំនួន ៥០លានដុល្លារ តាមរយៈធនាគារអភិវឌ្ឍន៍ជនបទនិងកសិកម្ម ពង្រីកវិសាលភាពគ្របដណ្តប់ និងកែសម្រួលលក្ខខណ្ឌឥណទានដូចជា បន្ថយអត្រាការប្រាក់សម្រាប់កម្ចីទុនបង្វិល (Working Capital) ពី ៦ភាគរយ មក៥ភាគរយ និង សម្រាប់ទុនវិនិយោគ ពី ៦.៥ភាគរយ មក៥.៥ភាគរយ ដោយមិនគិតកម្រៃសេវាផ្សេងៗ។ កែសម្រួលរយៈពេលឥណទានអតិបរមាពី ៥ឆ្នាំ ទៅ៧ឆ្នាំ សម្រាប់ទុនវិនិយោគ ខណៈរក្សាទុក រយៈពេលខ្ចី អតិបរមា២ឆ្នាំ សម្រាប់ទុនបង្វិល។

បន្តមិនអនុញ្ញាតឱ្យអតិថិជន ដែលទទួលកម្ចីនៅក្នុងកម្មវិធីពិសេសនេះ យកកម្ចីទៅប្រើប្រាស់ធ្វើ បុនហិរញ្ញប្បទាន (Refinancing)។ ផ្តល់ភាពទន់ភ្លន់លើលក្ខខណ្ឌចុះបញ្ជី ដែលក្នុងនោះសហគ្រាសធុនតូច និងមធ្យម ដែលមិនទាន់ចុះបញ្ជីផ្លូវការ អាចដាក់ពាក្យស្នើសុំឥណទានបាន ដោយបំពេញលក្ខខណ្ឌចុះបញ្ជីតាម ក្រោយក្នុងរយៈពេល១ខែបន្ទាប់ពីទទួលបានឥណទាន។ កែសម្រួលលក្ខខណ្ឌតម្រូវឲ្យ «សហគ្រាសធុនតូច និងមធ្យម បង្កើតឱកាសការងារថ្មីចាប់ពី៥នាក់ឡើងទៅ» ទៅជា »លើកទឹកចិត្តឲ្យសហគ្រាសធុនតូច និង មធ្យម ដែលទទួលបានឥណទាន ខិតខំបង្កើតឱកាសការងារថ្មី»។

ពិធីផ្សព្វផ្សាយគោលការណ៍ឥណទាននេះ អញ្ជើញចូលរួមជាអធិបតីភាពពីឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម, ឯកឧត្តម ខ្លូត ផន ប្រធានក្រុមប្រឹក្សាខេត្ត, បណ្ឌិត ហាវ វិសិដ្ឋ អគ្គនាយករងរដ្ឋបាលជលផល, តំណាងអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ និងនេសាទ, តំណាងអគ្គនាយកដ្ឋានសុខភាពភាពសត្វ និងផលិតកម្មពេទ្យសត្វ និងអភិបាលរងខេត្ត អភិបាលស្រុក និងមន្ទីរជំនាញពាក់ព័ន្ធក្នុងខេត្ត។

ថ្លែងក្នុងឱកាសនេះ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានបញ្ចាក់ថា តាមរយៈការដាក់ចេញកម្មវិធីនយោបាយយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល ខេត្តកំពង់ចាមកំពុងចម្រើនជាបន្តបន្ទាប់ទាំងផ្នែកសន្តិសុខ សណ្តាប់ធ្នាប់ សាធារណៈ សេដ្ឋកិច្ច សង្គមកិច្ច បរិស្ថាន និងសមិទ្ធផលរូបវ័ន្តជាច្រើន ពិសេសជីវភាពរស់នៅរបស់ប្រជាពលរដ្ឋកាន់តែប្រសើរ។

ទន្ទឹមគ្នានេះឯកឧត្តមអភិបាលនៃគណៈអភិបាលខេត្ត បានឱ្យដឹងទៀតថា នៅឆ្នាំ២០១៩-២០២០នេះ ខេត្តកំពង់ចាម សល់ស្រូវសម្រាប់នាំចេញចំនួន ១៧០ ៥៧៣តោន។ ដំណាំរួមផ្សំ បន្លែបានចំនួន ១៦៥,៨៦២តោន ការចិញ្ចឹមសត្វគ្រប់ប្រភេទ មានចំនួន ៦,២០៣,៦៦០ក្បាល និងក្រោយការហូប យើងនៅសល់សាច់ ៣១,៩៦២តោន។ ការងារចិញ្ចឹមត្រី បានចំនួន ៣៩,០៤០តោន និងក្រោយការហូបចុក យើងនៅខ្វះត្រីហូបចំនួន ២៤,០៨៨តោន៕