ប្រជាពលរដ្ឋ ២ពាន់គ្រួសារនៅស្មាច់មានជ័យ កោះកុង ចង់បានទឹកស្អាតប្រើប្រាស់

ទឹកទិញ​តាមរថយន្ត ដែលអ្នកភូមិនៅសង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង កំពុងប្រើប្រាស់ក្នុងជីវភាពប្រចាំថ្ងៃ- (រូបភាព ឈឹម មករា)។

(ខេត្តកោះកុង)៖ បច្ចុប្បន្ន​ប្រជាពលរដ្ឋ​​ជាង ២ពាន់គ្រួសាររស់នៅសង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង កំពុងបន្ត​ទទូចដល់អាជ្ញាធរមូលដ្ឋាន មន្ទីរជំនាញពាក់ព័ន្ធ និងក្រុមហ៊ុនផ្គត់ផ្គង់​ទឹកស្អាត សុំជួយតភ្ជាប់​បណ្តាញ​ចែក​ចាយ​ទឹក​ស្អាត​ឱ្យ​ដល់​តាម​ផ្ទះ​របស់ពួកគាត់។ ការស្នើសុំនេះ ក្នុងបំណងមិ​ន​ចង់បន្តប្រើប្រាស់ទឹកគ្មានសុវត្ថិភាព។​

លោក​ស្រី ណេត សុភី ពលរដ្ឋរស់នៅភូមិបឹងឃុនឆាង សង្កាត់ស្មាច់មានជ័យ បាននិយាយថា គ្មានទឹកស្អាតប្រើប្រាស់ធ្វើឱ្យ​គ្រួសារ​លោក​ស្រីចំណាយលុយច្រើនដើម្បីទិញទឹកបរិសុទ្ធ និងទឹក​ដឹ​កលក់​​តាមរថយន្ត។ លោកស្រីបន្ត​ថា​ រយៈពេល​ជាងបួន​ឆ្នាំហើយ ដែលស្នើសុំដល់អាជ្ញាធរជួយដោះស្រាយបញ្ហានេះ ប៉ុន្តែ​​រហូតម​កដល់​ពេល​នេះ​ អ្នកភូមិនៅតែគ្មានទឹកស្អាត។

លោកស្រី ណេត សុភី ៖ "បូមមកភ្លាម​អីចឹង ពេលទឹករងទៅយើងទិញសាច់ជូរមកកូរ រហូតដល់រងយើងដងមកដាក់ធុងផ្សេងទុកប្រើ ! បើអត់បូប ត្រូវទិញទឹកថាំងដាក់ឱ្យ គេគិតពីយើងមួយពាងថ្លៃពីរពាន់រៀលដូចគ្នា ខ្ញុំអត់​ដឹង​ថា ​​ម្ចាស់គេ​(អ្នកដឹកទឹកលក់) បូមទឹកមកពីណាទេ ព្រោះអីគេដឹក​ឡា​ន"។

ពលរដ្ឋម្នាក់ទៀត ដែលមានបំណងប្រាថ្នាចង់បានទឹកស្អាតតបណ្តាញចូលដល់ក្នុងផ្ទះ លោកស្រី ម៉ែន សៀន ក៏បានលើកឡើងដែរថា៖ "អ្នកភូមិគ្រប់តែគ្នាអត់ទឹកស្អាត អានេះជីកមកទឹកប្រៃ (អណ្តូ​ង​ស្នប់) ភ្លក្សមើលទៅដឹងហើយ ទឹកប្រៃទាំងអស់ យកទៅធ្វើអីកើត"។

ជុំវិញរឿងចង់បានទឹកស្អាតប្រើប្រាស់នេះ លោក ញ៉ែម យី ចៅសង្កាត់រងស្មាច់មានជ័យ ទទួលស្គាល់ថា​ ប្រជាពលរដ្ឋរស់នៅជាយៗសង្កាត់ស្មាច់មានជ័យ ប្រមាណជាង២០០០គ្រួសារ ក្នុងនោះរាប់​ទាំង​ភូមិស្មាច់​មាន​ជ័យ ភូមិបឹងឃុនឆាង និងភូមិ៣ ជួបការលំបាកដោយសារកង្វះទឹកស្អាតពិតមែន។ លោកបានបន្ថែមថា រាល់សំណើរបស់ពលរដ្ឋ លោក​បានបញ្ចូនទៅអាជ្ញាធរក្រុងអស់ហើយ ដោយរង់ចាំដំណោះស្រាយដូចគ្នា។

ឆ្លើយតបនឹងការលើកឡើងរបស់ប្រជាលរដ្ឋ អភិបាលក្រុងខេមរភូមិន្ទ លោក ឈេង សុវណ្ណដា ប​ញ្ជា​​​ក់ថា កន្លងទៅក្រុង​បានយកចិត្តទុក​ដាក់​ខ្ពស់លើបញ្ហាទឹកស្អាតនេះ តាមរយៈកិច្ចសុំអន្ត​រាគ​ម​ន៍​ទៅ​មន្ទីរ​ឧស្សា​ហក​ម្ម​ ក្រុមហ៊ុនផ្គត់ផ្គង់ទឹកស្អាត និងរដ្ឋបាលខេត្ត ដើម្បី​ឆ្លើយ​តបនឹងតម្រូវការចាំ​បា​ច់​របស់ប្រជាពលរដ្ឋ។

លោកអភិបាលក្រុងខេមរភូមិន្ទ បានបញ្ជាក់ថា ​ក្រុមហ៊ុនផ្គត់ផ្គង់ទឹកស្អា​ត​កំពុងអនុវត្តគម្រោងតភ្ជាប់បណ្តាញទឹកជាបណ្តើរៗនៅ​ភូមិក្បែរទីក្រុង។ លោក​​នឹង​ខិត​ខំ​សម្រ​ប​សម្រួលពន្លឿនដោះស្រាយបញ្ហាទឹកស្អាតបន្ថែមឱ្យអស់ពី​លទ្ធភាព។

ជាការកត់សម្គាល់ បច្ចុប្បន្នបណ្តាញទឹកស្អាតនៅក្នុងក្រុងខេមរភូមិន្ទ បើកចែកចាយឱ្យ​ប្រជាពល​រដ្ឋ​​ប្រើប្រាស់​មានកម្រិតនៅឡើយ។ គិតចាប់តាំង​ពី​ខែមីនា ​រហូតដល់ខែឧសភា ឆ្នាំ​២០២០នេះ ​ស្ថានភាព​កង្វះទឹក​ស្អាតមិនធ្ងន់ធ្ងររហូតដល់ដឹកទឹកចែកចាយជូនពលរដ្ឋដូច​កាល​ឆ្នាំ២០១៩។

គួរបញ្ជាក់ថា សង្កា​ត់​ស្មាច់​មាន​ជ័យ សង្កាត់ដងទង់ និងសង្កាត់ស្ទឹងវែងរបស់​ក្រុងខេមរភូមិន្ទ ខេត្តកោះកុង កំពុងប្រឈមការអត់ទឹកប្រើប្រាស់ជារៀងរាល់ឆ្នាំនៅរដូវប្រាំង។ ទាក់ទិននឹងបញ្ហាកង្វះទឹកស្អាតប្រើប្រាស់នេះ អាជ្ញា​ធរ​កំពុងរិះ​​រកគ្រប់​មធ្យា​បាយ​ដោះ​ស្រាយ​ជូន​ពលរដ្ឋ​។

(អត្ថបទដកស្រង់) - ​រក្សាសិទ្ធិដោយ ឈឹម មករា